Айтарым бар

 

НҰРМҰХАМЕД БАЙҒАРАЕВ, саясаттанушы: 

 

         "Мойындауымыз керек, Батыс елдерінде адамның өмір сүру сапасы жоғары. Оның ішіне жалақы, еркіндік, таңдау құқығы, этика, көшедегі тазалық – бәрі кіреді. Әрине, әр адам өзіне жайлы жер іздейді. Ол қалыпты нәрсе. Норма. Егер сенің еліңде сен қалаған жоғарыдағы факторлар болмаса, онда адам оны өзге жақтан іздейді. Білімді жастарды елде алып қалудың бір ғана жолы бар. Ол – өз елімізде де азаматтарға Батыстағыдай жағдай жасау. Және бұл әлемнің болмаса да, аймақтың таланттарын тартуға мүмкіндік берер еді."

Ұстаз мәртебесін бірге көтерейік!

Бізге жазылыңыз!


Республикалық "Ұстаз мәртебесі" газетіне жазылу құны

Қазпочта арқылы 6 айға - 1740 теңге (қала үшін)

6 айға - 1920 теңге (аудандар үшін)

Редакция арқылы 6 айға - 1680 теңге

Редакцияға хат

Біз туралы

Редакция құрамы

 Бас редактор – Нұрлан Нұрмахан

Жауапты хатшы –

Абай Тағыберген 

Журналистер

Толыбай Абылаев 

Айдар Сайлауов 

Жүлдызай Қалиева


 Байланыс телефоны:   8(7242) 20-16-19

Электронды пошта: This email address is being protected from spambots. You need JavaScript enabled to view it.

Фейсбуктегі парақша аккаунты: ustaz.martebesi.kz

Email:
Тақырып:
Текст:
Ұстаз мәртебесі

Ұстаз мәртебесі

      Қай кезде де білім құндылық. Солай болып та қала бермек. Дәуір өзгеріп, ғасыр толса да, адамзат біліммен биіктейді, білім арқылы интеграцияға аяқ басады. Мұны жаһанның мықты елдері дәлелдеп отыр. Ешбір өндіріссіз, не қазба байлықсыз білім арқылы экономикаға жол салып, адами капитал сапасын биік деңгейге жеткізген елдер аз емес. Бұл ретте Қазақстан жаһандық даму моделіне тек біліммен ғана бара алады.

   Өткенмен өлшеу дұрыс-ақ. Алайда құйыны қатты, трансформацияға толы ақпараттық тасқында білімнің қайнар бұлағын сақтай отырып, уақыт қажеттілігіне кірігу - білімге бәсекелестіктің шынымен туғанын айғақтайды. Мұны жақын күндері халыққа бағыттаған Елбасы Жолдауында да ашық айтылған. Ондыққа енген ұтымды ұсыныстардың бірінде білімге басымдық беру, цифрландыруға аяқ басу білім бағытындағы жаңа сапаны қажет етеді. Президент Нұрсұлтан Назарбаев қазақстандықтар алдында білімнің жаңа дәуірі туғанын, арқаны кеңге салып, бір бағытта қалып қоймауды, ең бастысы шынайы бәсекенің заманында дәуір қажеттілігінен туған жаңа технологиялардан тартынбай, дамуға бет алуды міндеттеді.

   Президенттің жетінші бағытқа "Адами капитал - жаңғыру негізі" деп басымдық беру кез келген саланың қозғаушы күші - адам және оның білімі арқылы келетінін қаперге салды. Білімнің барлық сатыларынан бастап саланы жан­дандырудың тетіктерін теріп берді. Айталық, орта білім берудің жа­ңартылған мазмұнға көшуі, оқыту сапасын күшейту, мек­тептерге жан басына қаржыландыру тетігін енгізу, өндірістік-техно­логия­лардың тілін үйренуге ша­қыру, цифрландыруға ептеп бой үйрету, тілдік кедергілерден құты­луды тек тапсырма деңгейінде емес, нақты әрі нәтижелі етуге күш салуды көздеді. Тағы бір басымдық - на­рыққа қажет еңбек күшін құрайтын кәсіптік саланың дамуы­на мойын бұру, алғашқы тегін мамандықпен оқыту, сала мұға­лімдерінің дәріс­терін интернетке салу арқылы тұтас халыққа қолжетімді ету. Мұның өзі кәсіптік саланың дамуына қан жүгіртеді. Ал, жоғары оқу орын­дарына қойылар талап та аз емес. Отандық ғылымды жаңа деңгейге көтеру, универ­ситеттерге акаде­миялық еркіндік беру, инвес­тициялық жобаларға ынта қою, әлемдік университет­тердің кам­пустарын ашу білім мен ғылымды дамытудың алдағы міндеттерге жол нұсқайды.

Жұма, 19 Қаңтар 2018 12:15

ЖАРЫС ЖОЛЫНДАҒЫ ЖЕҢІМПАЗДАР

       Мектеп оқушылары үшін әрбір байқаудың берері мол. Күнделікті сабақты оқи жүріп, ал-ған білімін байқау арқылы шыңдайтыны белгілі. Жыл сайын білім саласында мектеп оқушылары арасында ұйымдастырылатын пәндік олим­пиаданың өз алдына мақсат-міндеті бар. Десе де, әр мектептен жиналған оқушылардың білімін бір алаңда сынау кіл мықтының ішінде кім мықтыны таңдап береді. Өткен жылдың соңғы айында Қызылорда қаласының мектеп оқушылары қалалық пәндік олимпиадаға қа­тысты. Түрлі пәндерде өткен олимпиада екі кезеңді қамтыды.

    Қалалық білім бөлі­мінің мәліметіне сүйенсек, жалпы білім беретін пәндер бойынша Республикалық олимпиаданың І мектепішілік кезеңіне 54 мектептен 8-11 сынып оқушылары арасынан 5034 оқушы қа­тыс­ты. Алғашқы кезеңнен сүрінген оқушылар екін­ші кезеңге жолдама алмайды. Екінші кезең "Мұрагер" мектебінің базасында өткізілді. Қа­лалық кезеңге білім ошақ­­тарынан 8-11 сынып оқушылары арасындағы І кезеңде 1460 оқушы қа­тыс­ты. Оның ішінде қа­зақ бө­лімінде 1278, орыс бөлі­мінде 182 оқушы өз бі­лім­дерін сынады. Нәтижесінде, 353 бала жеңімпаз атанды. Оның ішінде І орынға 52 оқушы, ІІ орынға 96 оқушы, 205 оқушы жүлделі ІІІ орынға тұрақтады.

       Жаңа Жолдау ұстаздардың еңсесін көтеріп тастады. Себебі күні кешеге дейін қоғамда мұғалімдердің айлық-жалақысы еткен еңбегіне  сай еместігі айтылып келді. Бас ұстаз министр Ерлан Сағадиев те мұғалімдердің жалақысы өзге мамандықтармен салыстырғанда тө­мен екенін жақсы біледі. Сол үшін де жауапкершілігі мол білім саласының мамандарына төленер айлық-жалақы "мына күні көтеріледі" деп кесіп айта алмайды. Дегенмен, Елбасының биылғы Жолдауда көтерген мұғалім мәртебесі мен жалақысы туралы тапсырмадан кейін министрлік нақты әрекетке көшті. Ендеше, айтайық. Президенттің он нақты қадамында көзделген білім саласын жандандыру, адами капитал  сапасын арттыру бағытында Елбасы мұғалімдердің жағдайына ерекше тоқталды. Алдымен, мәртебесін көтеру қажеттігін, тиісінше, білімі мен біліктілігін дә­лел­деген ұстаздардың айлығын 30-50 пайыз аралығында көбейту қажеттігін баса айтты. Бұл үшін биыл қосымша 67 миллиард теңге бөлінбек. Әрине, айлығына үстеме алған ұстаздар үшін бұл өздерін ұдайы жетіл­діріп, білім жолында бәсекеге түсуге мүмкіндік береді. 

     Жолдаудан кейін ҚР Білім және ғылым министрлігі мұғалімдер жалақысы қалай көбейетіндігі, сынақ арқылы кімдер өте­тіндігін хабарлады. ҚР Білім және ғылым вице-министрі Бибігүл Асылова "Bag.kz" порта­лына берген мәліметінде жала­қы мұғалімдердің жұмыс өтілі мен біліктілігіне сәйкес төлене­тін­дігін баса айтқан. Мәселен, осы жылдың қаңтар айынан бас­тап жаңартылған білім беру фор­маты бойынша 1,2,5,7-сыныптарға сабақ беретін ұстаздардың жалақысы артады. Ал, 1-қыркүйектен бастап 3,6,8-сынып педагогтарының еңбек­ақысы көбейеді. Тиісінше, 2019 жылы 4,9-сыныпқа сабақ беретін ұстаздар, 2020 жылы 10-сынып мұғалімдерінің жалақысы қосылады. Демек, жаңа форматта сабақ беретін мұғалімдер осылайша 3 жыл ішін­де жалақысына қосымша үстеме алады. 

        Қазақстандықтардың ең басты қиындығы - тұрғын үй, баспана мәселесі. Үйге мұқтаж адамдар Сыр елінің өзінде жетіп артылады. Қазіргі уақытта Қызылорда облысының 44 045 тұрғыны "Тұрғын үй құрылыс жинақ банкінен" депозит ашып, оны толықтырып келеді. Бұл сан күн сайын көбейіп келе жатқаны та­ғы бар. Олар өз шоттарында жалпы сомасы 13 млрд. 306 млн. теңге болатын салымның басын құраған. Оның үстіне облыстық филиал жұмыс жасап келе жатқан жылдар ішінде аймақ тұрғындарына 10 млрд. 800 млн. теңгенің займын берген екен. Бұл қыруар қаржының бәрі - бір баспана алу үшін маңдай терін сарп кеткен халықтың ақ адал еңбегінің өтемі. Амал қанша, біздің елдегі ең тиімді әрі қолжетімді тұрғын үй алудың жолы осы ғана.

   Банктің аты банк. Олар өздеріне салымшы жинау арқылы істерін дөңгелетіп әкетеді. Тиімді жобалар ұсынады. Қолайлы шарттар жасап, әр түрлі тәсілдер арқылы халықтың қаржысын айналымға салады. Үйге зәру ел депозитке ақшасын са­ры майдай сақтап, жинап үйлі болуға үміт­тенеді. Тиісті қаржыны жинаған тұрғынға баспаналы болуға мүмкіндік бар. Оның үстіне қазір Қызылорда облысындағы "Тұр­ғын үй құрылыс жинақ банкінің" салымшылары "Қазпочта" АҚ арқылы тұр­ғын үй бағдарламаларына қатыса алады. Облыстың барлық тұрғыны банк ғимаратына келмей-ақ, Қазпочта арқылы депозит ашу және толықтыру, несие төлеу секілді қызмет түрлерін енді артық төлемдерсіз жүзеге асыруға мүмкіндігі бар. Бұл шет аудандар үшін өте ыңғайлы.

   Күнгейі мен көлеңкесі қатар жүретін шетелде білім алу тек қалтасында қаржысы барларға ғана арналмаған.  Білім қуып, ілім іздеген жастың арманына қанат байлаған мемлекеттік "Болашақ" бағдарламасы арқылы қазақ жастары шет елдің әр қиырында білім алып жүр. Бұл оқуды бітірген жастарға ғана бұйырған бақ емес. Әсілі, тек шет ел көру "Болашақпен" ғана шектелмейді. Өткен жылдан бастап кәсіптік сала мамандары, яғни мұғалімдер де шетелдің озық тәжірибесімен танысуға мүмкіндік алды. Бастысы, мемлекет есебінен. Алғашқы бастамаға қолы жеткендердің бірі - Қызылордадағы Құрылыс және бизнес колледжінің әдіскері  Жанар Махсатқызы. Ұлыбританияға барып, тілдік білімін жетілдіріп келген  ұстазбен тілдесіп қайттық.

   - Жанар Махсатқызы, шетелге ба­рып, тіл үйреніп қайтамын деп ойладыңыз ба? Жалпы, бұл білімге бағытталған бірінші сапар ма?

    - Әрине, болашағыңды болжай алмайсың. Тіл үйреніп, ағылшындардың ортасында жүремін деп ойламағаным рас. Алайда, бұл екінші рет шетелге шығуым. Алғашқы сапар кәсіптік саладағы дуальды оқы­ту, модульдік технологияны игеру мақсатында Беларусь мемлекетінде болған еді. Озық тәжірибені отандық оқу орнында енгізу мақсатында барып қайттым. Ал, бұл жолғы сапар кәсіптік сала мамандары үшін ерекше жоба болды. Әрине, қысқа мер­зімді тіл үйренуге бағытталды. ҚР Бі­лім және ғы­лым министр­лі­гі­нің бұй­рығы негі­зінде халықаралық "Болашақ" бағдарламасымен бір­лес­кен «Academic English and Teacher Educa­tion»жоба аз уақытта тілді меңгеріп, технология­ны игеруге жол ашуға бағытталды.

 

 

Жұма, 19 Қаңтар 2018 11:48

150 ОРЫНДЫҚ АУРУХАНА АШЫЛДЫ

      Әлеумет үшін қандай да бір жаңалық көңілге медет болары анық. Әсіресе, ауыл халқының игілігіне бағытталған жұмыстар халықтың өмір сапасын жақсартады. Жақында Қазалы ауданындағы Әйтеке би кентінде жаңа 150 орындық орталық аудандық аурухана пайдалануға берілді.

   Аудан халқының қуанышын еселеген әлеуметтік нысанның ашылу салтанатына облыс әкімі Қырымбек Елеуұлы келіп, тұрғындар мен дәрігерлерді  жаңа аурухананың  ашы­луымен құттықтады.

   - Қазіргі таңда Елбасы саясатының ар­қасында еліміздің денсаулық сақтау саласы жүйелі түрде дамуда, Қазақстанның түкпір-түкіпірінде озық технологиялармен жабдықталған жаңа медициналық мекемелер ашылуда. Соның бірі ретінде ауданда 150 орындық аурухана ашылды. Бұ­дан бөлек, биыл осы аурухана жанынан 250 орындық емхана салуды көздеп отырмыз. Қазір емхана құрылысын салу бойынша құжаттары әзір-ленуде, - деді ай­мақ басшысы.

Жұма, 19 Қаңтар 2018 11:32

АҚЫН ҰСТАЗ РУХЫН ҰЛАҒАТТАДЫ

  Бағзыдан ән-жырға төрін берген халықпыз. Ақынын ардақтап, әншісін қастер тұтқан жұртпыз. Қазіргі таңда да Елбасының "Болашаққа бағдар: рухани жаңғыру" бағдарламалық мақаласының аясында ұлттың қаймағы болып табылатын зиялыларымызға жер-жерде құрмет көрсетіліп жатыр. Ол да болса елдігіміздің, береке-бірлігіміздің жемісі.

   "Солдат өлсе орнын толтыруға болады, ақын өлсе орны қалай толмақ?" деген француздың даңқты қолбасшысы Наполеонның қанатты сөзі бар. Оны біздің бабаларымыз "Аққу - көл­дің, ақын - елдің иесі" деп айтып кеткен.

     Осы орайда, Е.Бозғұлов атындағы №249 мектеп-лицейде белгілі ақын, ұлағатты ұстаз "Ы.Алтынсарин", "Абай аманаты" төсбелгілерінің иегері Абдолла Сапарды еске алуға арналған поэзия кеші өтті.  

   Тағы бір айта кететін жайт, марқұм Абдолла ақын Қазалы топырағында өтетін қандай бір әдеби-мәдени шара болмасын, белсене араласып жүретін шығармашыл азамат еді. Аз сөйлесе де саз сөйлейтін ақынның университеттегі курстасы, Қазақстан Жазушылар Одағының бұрынғы кеңесшісі, белгілі ақын Саят Қамшыгер Сыр бойынан бар­ған адамдардан Абдолла досының хал-ахуалын ұдайы сұрастырып, сырттай тілекші болып жүретін.

    Абдолланың адами қасиеті кіші­пейіл, қарапайымдылығында еді. Өзін-өзі жарнамалау оған жат болатын. Соған қарамастан оның ел ішінде елеусіз­деу жүріп жазған жырлары саф алтынның сынығындай, кәусар бұлақтың тұнығындай әсерге бөлейтін жыр құмар көпшілікті. Таулар алыстаған сайын ас­қақтай түспек. Абдолла ақынның екін­ші өмірі - өлеңдерінің бұл кеш бастауы боларына бек сенімдіміз.

   Өнердегі, өлеңдегі жас өнерпаз шәкірттерінің ұйымдастыруымен өткен шарада көптеген республикалық жыр мүшәйраларында Сыр елінің атын шығарған шайырдың өлеңдері мен оған арналған арнау жырлар оқылды.

     Мәселен, ақын ізбасарлары - "Сыр үміті" жастар сыйлығының иегері Ұлан Қалиев, облыстық, республикалық жыр бәйгелерінің жеңімпаздары Ақтілеу Қалдыбай, Бақытжан Қаһар, Назерке Бурхан, Елнұр Өмірзақ, Ақсұңқар Әлмахан, Рамазан Әбілдос, Динара Нұрлыбаева, Нұрбол Шыныбай, Айдос Мейірхан секілді жас ақындар өз өнерлерін ортаға салды. Ал, Қ.Сәтбаев атындағы №216 мектептің 8-сынып оқу­шысы Нұрболат Төлеш ақынның образын сомдап, шын ақынның өл­мей­тінін, жырлары да мәңгі жасай бе­ретінін танытқандай болды.

   Мұнымен қатар, республикалық жас айтыскерлердің арасында жүлдегер атанып жүрген майдакөлдік ақын Мұхаммед-Шархан Қанапия мен Ғ.Мұратбаев ауылының тумасы Елнұр Нұрқасымның арасында тамаша айтыс болып өтті. Олардың жұрттың делебесін қоздырған шаппа-шап айтысы Қазалы ауданында кенжелеп келе жатқан бұл өнердің тамырына қан жүгірткендей болды.

     Сондай-ақ, шара барысында ақынның өлең өлкесіндегі достары республикалық "Алтын домбыра" айтысының екі мәрте бас жүлдегері Мұхтар Ниязовтың, республикалық жыр додаларының жүлдегері Саят Қамшыгердің, Абдолла Рахметоллаұлының адамгершілік болмысына, азаматтық қырына тоқталған видеоестеліктері көрсетілді.

     "Құрмет" орденінің иегері, зейнеткер ұстаз Күләш Мергенбаева жуырда ғана Абдолла Сапардың есімі "Лицейлік жүз есім" кітабына енгендігі жөнінде айғақтайтын куәлікті ақынның анасына тапсырды. Мұнымен қо­са, өмірден ерте кеткен ақынның сый­лас ағасы Құдайберген Есекеев те өзінің жүрекжарды өлеңін оқыды.

      Еске алу кешінің соңы ақынның сөзіне жазылған "Лицей маршы" әнімен қорытындыланды.

Есет ТАБЫНБАЕВ,

Қазалы ауданы

Жұма, 19 Қаңтар 2018 11:30

ДҮБІРЛІ ДОП ДОДАСЫ

     Білім саласында ұзақ жылдар бойы қызмет жасаған, ҚР Білім беру ісінің құрметті қызметкері және «Ерен еңбегі» медалінің иегері, Қазақ ССР-нің кәсіптік білім беру ісінің үздігі Мәжит Жәмитұлынының есімін еске алу мақсатында "Евразия" спорт кешенінде шағын футболдан облыстық ашық турнир өтті. 2018 жылы екін­ші рет ұйымдастырылып отыр­­ған турнирге Байқоңыр, Қызылорда қалаларынан және аудандардан 16 команда, жалпы саны 220 аяқдопшы қатысып, бабы мен бағын сынға салды.

   Бұқаралық спортты дамытуға өз үлесін қосқан ау­қым­ды спорт додасы өте тартысты өтті. М.Жәмитұлы­ның өмірі әлемдегі бейбіт әрі игілікті сала - спортпен байланысты болғандықтан, спорт саласының мамандары белгілі азаматтың есімін ескерусіз қалуын құп көрмеген. Ол футбол ойнап, салауатты өмір салтын насихаттауға өз үлесін қосқан азамат. Сондықтан айтулы шара білім саласының үздігі есімімен аталып отыр.

    Қалаға келген қонақтар тарапынан суырылып шық­қан топ болмады. Жеңіс қызылордалық "Азамат" коман­да­сының еншісінде қалды. Олар финалда "Орион" командасын қапы қалдырды. Ойынның негізгі уақыты тең аяқталғандықтан жеңімпаз тек айып добын орындау барысында анықталып, есеп 4:2 нәтижесімен түйінделді. 3 орынды қызылордалық "Престол" командасы ен­шілесе, 4 орын "Капстрой" командасына бұ­йырды. 

    Ойынның қызықты өрбуіне себепші болған үздіктер де назардан тыс қалмады. Олар арнайы номинациялар арқылы анықталып, марапат төрінен көрінді. Атап айтар болсақ, "Үздік қақпашы" - Жалғас Қадырберген (Прес­тол), "Үздік қорғаушы" - Бекзат Құрманалиев (Орион), "Үз­дік шабуылшы" - Бағдат Исмайлов (Капстрой), "Үздік ойыншы" - Ержан Қазыбеков (Азамат) сынды футбол­шы­ларға бұйырды.

Айдар САЙЛАУОВ

 

         Қызылордада қыздар арасында волейболдан өткен ҚР чемпионаты 10 қаңтар күні өз мәресіне жетті. 5 қаңтарда "Мұз айдыны" спорт кешенінде өткен жарыс 2004-2005 жылдары туған жасөспірім қыздар ара­сында болды. Бұл айтулы дода - Қазақстан Республи­касының қысқы чемпионаты. Сондықтан аталмыш сайыс спортшылар үшін өте маңызды болып саналады.

  Спортшылардың дені Астана, Алматы қалаларынан, Маңғыстау, Батыс Қазақстан, Оңтүстік Қазақстан, Шығыс Қазақстан, Солтүстік Қазақстан, Павлодар, Қостанай, Қызылорда облыстарынан жиналды. 250-дей спортшы қыз 16 команда болып, бес күн бойы жеңіс үшін сынға түсті. Кіл мықтының ішінен кім мықты екені соңғы жарыс күні анықталды.

   Республикалық чемпионат облыс бойынша екінші мәр­те өткізілсе, республикада үшінші рет ұйымдас­ты­ры­луда екен. Былтырғы жылы Сыр елінде республи­ка­лық көктемгі чем­пионат өткізілген еді. Ал, осы жолғы жарыс қор­ытындысы бойынша қызылжарлық қыздар көш бастады. Олар чемпионаттың шеберлері екенін дәлелдеп, І орын­ды еншіледі. ІІ орын қостанайлық қыз­дарға бұйы­рып, ІІІ орын Елордадан келген арулардың қоржынында кетті.

Бейсенбі, 11 Қаңтар 2018 03:46

13 мың шетелдік білім алып жүр

   Қазақ жастары құрлық асып, шетел көріп жатса, отандық білімге бет бұрған шетелдік студенттер де аз емес. Бүгінде олардың саны 13 мыңға жуықтапты. Бұл туралы ҚР Білім және ғылым министрлігі хабарлады.

   Ресми мәліметке иек артсақ, жылына 10 ағылшын тіліндегі білім беру бағдарламасы құрастырылатын болады. Бұл ретте университеттерге  30-дан астам шетелдік топ-менеджер шақыртылған.

   Айту керек, бүгінде 50 ЖОО-да қос дипломдық білім беру бағдарламасы бойынша оқыту жүзеге асырылуда. Бұл бағыт бойынша жыл сайын 5 жоғары оқу орнын қосылмақ. Минестрліктің жазуынша, 2020 жылға дейін ЖОО-дағы шетелдік студенттердің, оның ішінде ақылы негізде білім алушылардың үлесі 5 пайызды құрайды.

«Ұстаз-ақпарат»

Page 1 of 62
онлайн флеш игрынародная медицинадиеты

Сайт бойынша іздеу

Сауалнама

Бүгінгі күні жұмысқа тұру мүмкін бе?

Ізденсен табуға болады - 27.3%
Таныс-тамыр арқылы орналасуға болады - 33.3%
Пара беріп кіруге болады - 12.1%
Уақытша жұмыстарға тұруға болады - 27.3%

Total votes: 33
The voting for this poll has ended on: 13 Қаң 2018 - 00:00

Күнтізбе

« Қаңтар 2018 »
Дс Сс Ср Бс Жм Сб Жк
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

Серіктестер

 

Бұлтты

2°C

Қызылорда

Бұлтты

Құрғақ 93%

Жел 1.61 km/h

  • 5 Нбр 2015

    AM Fog/PM Clouds 6°C 0°C

  • 6 Нбр 2015

    AM Clouds/PM Sun 7°C 3°C